വല്യ ഇഷ്ടം

'ഉണ്ണിയ്ക്ക് അച്ഛനെയാണോ അമ്മയെയാണോ ഏറ്റവും ഇഷ്ടം ?'

ഉണ്ണി മിണ്ടിയില്ല , ഇനിയിപ്പോ കക്ഷിക്ക് മനസ്സിലാവാഞ്ഞിട്ടാണോ ?

' ഉണ്ണിയ്ക്ക് അച്ചനെയാണോ അമ്മയെയാണോ വലിയ ഇഷ്ടം ?' ഞാന്‍ രണ്ട് കയ്യും മലര്‍ക്കെ തുറന്നു പിടിച്ചു കൊണ്ടു ആവര്‍ത്തിച്ചു . (ലോകത്തിന്റെ അങ്ങേ അറ്റം മുതല്‍ ഇങ്ങേ അറ്റം വരെ അതില്‍ കൊള്ളണം )

പത്രത്തില്‍ മുങ്ങിക്കിടന്നിരുന്ന അച്ഛന്‍ തലപൊക്കി ചെവി വട്ടം പിടിച്ചു ,

ഉണ്ണി അവന്റെ രണ്ട് കയ്യും വിരിച്ച് കണ്ണുകള്‍ രണ്ടും മിഴിപ്പിച്ചു പറഞ്ഞു

'ഉന്നിയ്ക്ക് വലിയ ഇഷ്ടം വലിയ മരപ്പട്ടീനെ !'

ഞങ്ങള്‍ മാതാപിതാക്കന്മാരുടെ കണ്ണ് തള്ളിപ്പോയി .

രണ്ടു ദിവസം മുന്നേ ചായ്പ്പിലൊരു മരപ്പട്ടീനേം കുഞ്ഞിനേം കണ്ടേപ്പിന്നെ ഉണ്ണിയുടെ കഥകളിലും പാട്ടുകളിലും മരപ്പട്ടി പറന്നു നടന്നു . വാലില്‍ നിറയെ രോമമുള്ള വലിയ മരപ്പട്ടിയാണ് അവന്റെ പ്രിയപ്പെട്ട മരപ്പട്ടി .

ഇതാണ് സംഭവത്തിന്റെ പിന്നാമ്പുറ കഥ , തെറ്റിദ്ധരിക്കല്ലേ നാട്ടാരെ !