ഏകയായ് ഞാന്‍ ജനിച്ച നാള്‍
ഏകയാണെന്നെ ഓര്‍മ്മിപ്പിച്ച നാള്‍
ജന്‍മം നല്‍കിയവര്‍ ജന്മദിനത്തില്‍
ഈ ജന്‍മത്തെ വെറുത്ത നാള്‍ !
കൈ പിടിച്ചേല്‍പ്പിച്ചവരും
കരം ഗ്രഹിച്ചവനും
കൈ വിട്ട നാള്‍ , എനിക്കായി
മത്സരിച്ച നാള്‍ !
എനിയ്ക്കും പിറക്കാനിരിക്കുന്ന കുഞ്ഞിനും
ഒരേ മനസ്സെന്നു തിരിച്ചറിയാത്തവര്‍ ,
വിലയെന്തെന്നും മൂല്യമെന്തെന്നും
വേര്‍ തിരിച്ചറിയാത്തവര്‍,
അവരെനിയ്ക്കും കുഞ്ഞിനും
വിലപേശിയവര്‍ !
അടക്കി വച്ചൊരാ ഏങ്ങലുകളില്‍
ഞാനെന്‍ മനസിന്‍ തെറ്റിയ താളം കേട്ടു.
അടിവയറില്‍ തുടിച്ചൊരാ ഹൃദയ താളം
തെറ്റിയ താളത്തെ തിരികെ തന്നു!
ഇനിയും ഉണങ്ങാത്ത മുറിവുകള്‍
അതിലുപ്പു പോല്‍ നീറുന്നു- വീണ്ടുമൊരു ജന്‍മനാള്‍
