Tuesday, January 12, 2016

ഹവ്വ



എന്താണ് ഈ ഹവ്വ അമ്മച്ചി എപ്പോഴും ഉറക്കെ ചീത്ത വിളിച്ചു കൊണ്ടിരിക്കുന്നത്?

ഉണ്ണിയ്ക്കെല്ലാത്തിനും കാരണം അറിയണം. 

രാവിലേ അയല്‍വക്കത്തെ അമ്മച്ചി തെറി വിളി തുടങ്ങിയിരിക്കുന്നു. അപ്പുറത്തെ കോഴി അവരുടെ പുരയിടത്തില്‍ കാഷ്ടിച്ചതാണ് ഇന്നത്തെ പ്രശ്നം. . 

“അതേ, ഞങ്ങടെ നാട്ടിലിതിനു ചിന്നന്‍ എന്ന്‍ വിളിക്കും, പ്രായാവുമ്പോ വരണ പ്രാന്താ, ഒരു ചികിത്സേം ഇല്ല. നേരെ നില്‍ക്കൂ ഉണ്ണീ.. ടൈ കെട്ടട്ടെ!!”

“അതെന്താ അമ്മച്ചിക്ക് മാത്രം ഇങ്ങനൊരു ചിന്നന്‍?”, ചെക്കന്‍ വിടണ മട്ടില്ല.

 “അമ്മച്ചിക്ക് ആരൂല്ല. പണ്ട് പണ്ട് ഉണ്ണീടെ അപ്പൂപ്പനും അമ്മൂമ്മയും ഈ വീട് വക്കണേ മുന്‍പ്, അമ്മൂന്റെം അമ്പാടിയുടെം കാര്‍ത്തൂന്റേം  ഒക്കെ വീട് വയ്ക്കണേ മുന്‍പ്, ഈ നാട്ടില്‍ ആദ്യായിട്ട് വീട് വച്ചത് ഈ അമ്മച്ചീം, അമ്മച്ചിയുടെ ഭര്ത്താവുമായിരുന്നു. ആദ്യം വന്ന അമ്മച്ചി എന്ന പേരില്‍ ആള്‍ക്കാര് കളിയാക്കി വിളിക്കണതാണ് ഹവ്വ അമ്മച്ചിയെന്ന്‍. ഉണ്ണി, അമ്മച്ചി എന്ന്‍ മാത്രം വിളിച്ചാ മതീട്ടോ.പാവം അമ്മച്ചി, ഭര്‍ത്താവ് മരിച്ചപ്പോ ഒറ്റയ്ക്കായി. ഒറ്റയ്ക്കായവര്‍ ആരോട് മിണ്ടും? ഒറ്റയ്ക്കല്ലാത്തവര്‍, അവരോട് മിണ്ടില്ല താനും. അപ്പൊ അവര്‍ കാക്കയോടും പൂച്ചയോടും കോഴിയോടും മിണ്ടും. ചിലപ്പോ പിണങ്ങും. പിന്നെ ദേഷ്യപ്പെടും. അത് ചിലപ്പോ ഉറക്കെയായി പോവും ന്ന് മാത്രം.ഒറ്റയ്ക്കാകുമ്പോ, നമ്മളും ചിലപ്പോ ഇങ്ങനെയൊക്കെ തന്നെയായി പോവും.നിന്‍റെ അമ്മയ്ക്ക് ഇപ്പൊ തന്നെ പ്രാന്താ.. അപ്പൊ പ്രായാവുമ്പോ ചിന്നനൂടെ ആവുമ്പോ നല്ല രസമായിരിക്കും!!”

ഞങ്ങള്‍ രണ്ടാളും കൂടി ചിരിച്ചു.

 ********************************************************************************************
 എന്നും എന്നെ കാണുമ്പോ ഹവ്വ അമ്മച്ചിയുടെ പതിവ് ചോദ്യമുണ്ട്, “സമയം എത്രയായി മോളെ ?”പത്ത് വര്ഷം അയല്‍വക്കത്തുണ്ടായിട്ടും എന്നോട് അവര്‍ ഒരിക്കല്‍ പോലും മുഷിഞ്ഞ് സംസാരിച്ചിട്ടില്ല. എന്നും ഒരു വലിയ പുഞ്ചിരിക്കൊപ്പം കൃത്യസമയം ഞാന്‍ പറഞ്ഞു പോരുന്നു. 

ബസ് പിടിക്കാനായി ഇടവഴിയിലൂടെയുള്ള ഇന്ന് രാവിലത്തെ ഓട്ടത്തില്‍ മുള്ള് വേലിയില്‍ കുരുങ്ങിയ എന്‍റെ സാരിത്തുമ്പ്‌ സൂക്ഷിച്ച് ഊരിയെടുക്കുന്നതിനിടയില്‍ അവര്‍ പറഞ്ഞു.. “എന്തൊരോട്ടാ ഇത്, ങാ, ഓടിക്കോ ഓടിക്കോ..” 

വീണ്ടും ഒരു ലോഡ് പാല്‍പുഞ്ചിരി അവിടിറക്കി, ഞാന്‍ ഓട്ടം തുടര്‍ന്നു. 

അല്ലേലും എന്‍റെയീ ഓട്ടം എങ്ങട്ടെയ്ക്കാ.. ഓടി ഓടി ഒടുവിലൊരു ഹവ്വ അമ്മച്ചിയാവാന്‍..

No comments:

Post a Comment